mauj-e-sarsar kī tarah dil se guzar jāoge
kis ko ma.alūm thā tum dil meñ utar jāoge
chār-sū vaqt kī gardish kī fasīl-e-shab hai
bach ke is gardish-e-daurāñ se kidhar jāoge
ā.īna-ḳhāne se dāman ko bachā kar guzro
ā.īna TuuTā to rezoñ meñ bikhar jāoge
ik zarā aur qarīb-e-rag-e-jāñ aao to
mere ḳhūñ-nāb meñ tum Dhal ke sañvar jāoge
dekho vo chāñd sisaktā hai ufuq kī had par
tum bhī is chāñd kī mānind guzar jāoge
is bharī bazm se hans-bol ke ruḳhsat ho lo
kal jo uTThoge to bā-dīda-e-tar jāoge