hamārā un kā ta.alluq jo rasm-o-rāh kā thā
bas us meñ saarā salīqa mire nibāh kā thā
tujhe qarīb se dekhā to dil ne sochā hai
ki terā husn bhī ik zāviya nigāh kā thā
tujhe tarāsh ke dil meñ sajā liyā maiñ ne
qusūr is meñ mirī rif.at-e-nigāh kā thā
chale the yuuñ to ka.ī log kū-e-jānāñ ko
zarā sā ham se magar iḳhtilāf raah kā thā
tirī jafā kā ḳhudā silsila darāz kare
ki us se apnā ta.alluq bhī gaah gaah kā thā