rāsta samundar kā jab rukā huā paayā
aur bhī kināroñ ko kāTtā huā paayā
der tak hinsā thā maiñ dostoñ kī mahfil meñ
lauT kar na jaane kyuuñ dil dukhā huā paayā
dhuup ne TaTolā jab munjamid chaTānoñ ko
barf ke tale laavā khaultā huā paayā
sochiye kaheñge kyā log aise mausam ko
jis meñ sabz shāḳhoñ ko sūkhtā huā paayā
mere vāste shāyad ḳhat meñ thā vahī jumla
tez raushnā.ī se jo kaTā huā paayā
niiñd kī parī āḳhir ho ga.ī ḳhafā ham se
aur koī āñkhoñ meñ jab chhupā huā paayā