luTā diye the kabhī jo ḳhazāne DhūñDhte haiñ
na.e zamāne meñ kuchh din purāne DhūñDhte haiñ
kabhī kabhī to ye lagtā hai maiñ vo lamha huuñ
ki ik zamāne se jis ko zamāne DhūñDhte haiñ
kuchh ehtiyāt bhī ab ke talab meñ rakhnā paḌī
sau us ko aur kisī ke bahāne DhūñDhte haiñ
lapak ke aate haiñ siine kī samt tiir aise
parind shāḳh pe jaise Thikāne DhūñDhte haiñ
hamārī sāda-mizājī bhī kyā qayāmat hai
ki ab qafas hī meñ ham āshiyāne DhūñDhte haiñ