kuchh ḳhayāl-e-dil-e-nāshād to kar lenā thā
vo nahīñ thā to use yaad to kar lenā thā
kuchh uḌānoñ ke liye apne paroñ ko pahle
jumbish o jast se āzād to kar lenā thā
phir zarā dekhte tāsīr kise kahte haiñ
dil ko bhī shāmil-e-fariyād to kar lenā thā
koī tāmīr kī sūrat bhī nikal hī aatī
pahle is shahr ko barbād to kar lenā thā
qais ke baad ġhazālāñ kī tasallī ke liye
'hāshmī' dasht ko ābād to kar lenā thā