dhuup bārish havā kamar-basta
aur darīche meñ ek guldasta
peḌ se peḌ kaT gayā varna
kyā kulhāḌī agar na ho dasta
ġham se aise niDhāl huuñ jaise
ek bachche kī piiTh par basta
bārishoñ kī duā.eñ māñgī haiñ
aur dīvār ghar kī hai ḳhasta
ek jugnū thā aas kī sūrat
bhar gayā raushnī se sab rasta
bāñdh rakkhā hai kab se raḳht-e-safar
kabhī āvāz de koī rasta
baat ḳhushbū kī thī magar 'fārūq'
dhyān aayā kisī kā barjasta