is shahr-e-tilismāt kā dastūr ajab hai
har shaḳhs fasurda hai magar ḳhanda-ba-lab hai
jaise ghane jañgal meñ koī aag lagā de
is shahr meñ sūraj kā nikalnā bhī ġhazab hai
be-kār hai be-ma.anī hai aḳhbār kī surḳhī
likkhā hai jo dīvār pe vo ġhaur-talab hai
kyā mujh ko uThā.egā koī merī jagah se
patthar huuñ jo ta.amīr kī buniyād kā rab hai
jo aañkh kī putlī meñ rahā nuur kī sūrat
vo shaḳhs mire ghar ke añdhere kā sabab hai