kitne tafakkurāt se āzād ho gayā
vo aadmī jo iiñT pe sar rakh ke so gayā
sūraj Dhalā to taaq meñ jaltā huā diyā
tārīkiyoñ se bar-sar-e-paikār ho gayā
apnī ġhalāzateñ thiiñ ki az-rāh-e-iltifāt
sailāb shahar ke dar-o-dīvār dho gayā
ik dost se yahāñ bhī mulāqāt ho ga.ī
rahnā yahāñ bhī ab mirā dushvār ho gayā
ik aur khet pakkī saḌak ne nigal liyā
ik aur gaañv shahar kī vus.at meñ kho gayā
'ḳhālid' mujhe to achchhī tarah yaad bhī nahīñ
vo hādsa jo kal mirī palkeñ bhigo gayā