jahān-e-dil meñ sannāTā bahut hai
samundar aaj kal pyāsā bahut hai
ye maanā vo shajar sūkhā bahut hai
magar us meñ abhī saayā bahut hai
farishtoñ meñ bhī jis ke tazkire haiñ
vo tere shahr meñ rusvā bahut hai
ba-zāhir pur-sukūñ hai saarī bastī
magar andar se hañgāmā bahut hai
use ab bhuul jaanā chāhtā huuñ
kabhī maiñ ne jise chāhā bahut hai
vo patthar kyā kisī ke kaam aatā
magar sab ne use puujā bahut hai
mirā ghar to ujaḌ jā.egā lekin
tumhāre ghar ko bhī ḳhatrā bahut hai
mirā dushman mire ash.ār sun kar
na jaane aaj kyuuñ royā bahut hai