kyā ḳhabar thī ki tire saath ye duniyā hogī

merī jānib mirī taqdīr hī tanhā hogī

aarzū kī ye sazā hai ki zamāna hai ḳhilāf

un se milne kī ḳhudā jaane sazā kyā hogī

marmarīñ jism kā charchā lab-o-ruḳhsār kī baat

merī koī to ġhazal un kā sarāpā hogī

ashk-e-ġham piine meñ taklīf to hotī hai magar

sochtā huuñ ki mohabbat tirī rusvā hogī

nāma-bar bhī hai taraf-dār ab un kā 'anjum'

mere hālāt kī ab un ko ḳhabar kyā hogī