shaam ke āsār giile haiñ bahut
phir mirī ā.ankhoñ meñ tiile haiñ bahut
tum se milne kā bahāna tak nahīñ
aur bichhaḌ jaane ke hiile haiñ bahut
kisht-e-jāñ ko ḳhushk-sālī khā ga.ī
mausamoñ ke rañg piile haiñ bahut
barf pighlī hai farāz-e-arsh se
āsmāñ ke rañg niile haiñ bahut
bel kī sūrat haiñ ham phaile hue
ham faqīroñ ke vasīle haiñ bahut
maiñ bhī apnī zaat meñ ābād huuñ
mere andar bhī qabīle haiñ bahut
log bastī ke bhī haiñ shīrīñ-sifat
mere naġhme bhī rasīle haiñ bahut
'qais' ham jogī haiñ apne shahr ke
naag to ham ne bhī kiile haiñ bahut