roz havā meñ uḌne kī farmā.ish hai
ye merī miTTī meñ kaisī ḳhvāhish hai
chehra chehra ġham hai apne manzar meñ
aur āñkhoñ ke pīchhe ek numā.ish hai
ik terī āvāz nahīñ aatī varna
chhoTe se is ghar meñ har āsā.ish hai
ab ke sāvan aa.e to tum aa jaanā
saare bastī vāloñ kī farmā.ish hai
ik din shīsh-mahal se bāhar bhī dekho
ḳheme kī bhī apnī ek rihā.ish hai
un rañgoñ ko sūraj khā jaatā hai 'qais'
jin rañgoñ meñ thoḌī sī ālā.ish hai