ḳhushī milī to bahut hī udaas baiThe rahe
chalā gayā vo to ham us ke paas baiThe rahe
jamāl-e-yār kī lazzat bayān kyā karte
nazar meñ shauq badan meñ hirās baiThe rahe
barahnagī hī kuchh aisī thī shahr-e-ġhurbat kī
qabā pahan ke bhī ham be-libās baiThe rahe
ye vāqi.a mirī āñkhoñ ke sāmne kā hai
sharāb naach rahī thī gilās baiThe rahe
isī ko husn-e-nazar kā kamāl kahte haiñ
tamām shab tire lazzat-shanās baiThe rahe
Thahar Thahar ke vo dariyā bulā rahā thā 'qais'
ham apnī āñkhoñ meñ bhar bhar ke pyaas baiThe rahe