maiñ apnī aañkh bhī ḳhvāboñ se dho nahīñ paayā
maiñ kaise dūñgā zamāne ko jo nahīñ paayā
shab-e-firāq thī mausam ajiib thā dil kā
maiñ apne sāmne baiThā thā ro nahīñ paayā
mirī ḳhatā hai ki maiñ ḳhvāhishoñ ke jañgal meñ
koī sitāra koī chāñd bo nahīñ paayā
hasīn phūloñ se dīvār-o-dar sajā.e the
bas ek barg-e-dil aasā piro nahīñ paayā
chamak rahe the andhere meñ soch ke jugnū
maiñ apnī yaad ke ḳheme meñ so nahīñ paayā
nahīñ hai harf-e-tasallī magar kahūñ 'sāhil'
nahīñ jo paayā kahīñ yaar to nahīñ paayā