hādse pyaar meñ aise bhī to ho jaate haiñ
rat-jage ḳhema-e-taskīn meñ ho jaate haiñ
ba.az auqāt tirā naam badal jaatā hai
ba.az auqāt tire naqsh bhī kho jaate haiñ
chalte chalte kisī raste ke kināre pe kahīñ
yaad ke phuul masāfat meñ piro jaate haiñ
tujh ko dekhā hai to āsār nazar aa.e haiñ
tujh ko dekhā hai to maazī ko bhī ro jaate haiñ
ham chale jaate haiñ is shahr ke jañgal se kahīñ
tum hameñ dard kī ḳhairāt to do jaate haiñ