ab to ruuTh jaane kā vaqt hī nahīñ miltā
tujh ko āzmāne kā vaqt hī nahīñ miltā
so chuke haiñ jo armāñ yaas ke shabistāñ meñ
ab unheñ jagāne kā vaqt hī nahīñ miltā
kis tarah balā.eñ ab tujh ko diid kī ḳhātir
rāsta sajāne kā vaqt hī nahīñ miltā
aarzū kī jo duniyā kho ga.ī hai rāhoñ meñ
us ko DhūñD laane kā vaqt hī nahīñ miltā
yuuñ taras ga.iiñ āñkheñ ḳhud ko dekh lene ko
aa.ina dikhāne kā vaqt hī nahīñ miltā
vaqt ke taqāze haiñ mere ḳhushk hoñToñ ko
giit gungunāne kā vaqt hī nahīñ miltā
un tumhārī yādoñ kī raushnī ġhanīmat hai
ab diye jalāne kā vaqt hī nahīñ miltā