javānī aa.ī murād par jab umañg jaatī rahī bashar kī

nasīb hote hī chaudhvīñ shab shikoh ruḳhsat huī qamar kī

vo shoḳh chitvan thī kis sitam kī ki jis ne chashmak kahīñ na kam kī

kisī taraf ko jo barq chamkī to samjhe gardish use nazar kī

tirā hī duniyā meñ hai fasāna tirā hī shaidā.ī hai zamāna

tire hī ġham meñ huiiñ ravāna nikal ke rūheñ ḳhudā.ī bhar kī

na āsmāñ hai na vo zamīñ hai makāñ nahīñ vo jahāñ makīñ hai

payambaroñ kā guzar nahīñ hai rasā.ī hai mere nāma-bar kī

khiñchā jo tūl-e-shab-e-judā.ī añdherī madfan kī yaad aa.ī

nigāh o dil par vo yaas chhā.ī umiid jaatī rahī sahar kī

jo ishq-bāzoñ ko āzmāyā lagā ke chhuriyāñ ye qahr Dhāyā

yahāñ yahāñ tak lahū bahāyā ki naubat aa.ī kamar kamar kī

gire jo kuchh surḳh gul zamīñ par kahā ye bulbul ne ḳhaak uḌā kar

huā hai va.ada mirā barābar ye sūrateñ haiñ mire jigar kī

maqām-e-ibrat hai aah ai dil ḳhudā hī kī hai panāh ai dil

nahīñ hai kuchh zād-e-rāh ai dil adam se tākīd hai safar kī

ye ham ne kaisā safar kiyā hai musāfiroñ ko rulā diyā hai

ajal ne āġhosh meñ liyā hai ḳhabar bhī ham ko nahīñ safar kī

vo jald yā-rab inhīñ ko taake lagā de do tiir in par aa ke

ye donoñ rah jaa.eñ phaḌphaḌā ke maiñ dekhūñ lāsheñ dil o jigar kī

kisī kā ma.ashūq chhūTtā hai sahar kā vaqt us ko lūTtā hai

koī ye siine ko kūTtā hai nahīñ hai āvāz ye gajar kī

khichā hai zartār shāmiyāna guloñ se aatī hai bū shahāna

dikhā ke qudrat kā kārḳhāna lahad ne hasrat bhulā dī ghar kī

ġhashī kā aalam vo zor par hai mizāj-e-sehhat se be-ḳhabar hai

davā kā ġhaflat-zada asar hai ḳhabar davā ko nahīñ asar kī

shabāb ne ḳhud-numā banāyā ye nāz-e-ḳhushrūī ne jatāyā

hayā meñ jis vaqt farq aayā to un ke mukhḌe se zulf sarkī

huā huuñ chaurañg teġh-e-hasrat ki dafn kī hai mirī ye sūrat

kisī taraf ko hai dil kī turbat kahīñ hai turbat mire jigar kī

jo us ne zid kī to aafat aa.ī duhā.ī dene lagī ḳhudā.ī

qayāmat us bevafā ne Dhaa.ī idhar kī duniyā 'sharaf' udhar kī