havas gulzār kī misl-e-anādil ham bhī rakhte the

kabhī thā shauq-e-gul ham ko kabhī dil ham bhī rakhte the

qazā bhī tere hāthoñ chāhte the tujh ko kyā kiije

nahīñ to teġh-e-dam ke saath qātil ham bhī rakhte the

ḳhatā-e-ishq par ham par na itnā bhī sitam Dhaao

agar chāhā to chāhā kyā huā dil ham bhī rakhte the

ḳhudā ko ilm hai zinda hai yā jal-bhun gayā shab ko

dil apnā tere parvānoñ meñ shāmil ham bhī rakhte the

mirī jāñ-bāziyoñ par gor meñ rustam ye kahtā hai

na the aise jarī go sher kā dil ham bhī rakhte the

ilāqa ishq kā lete ye soche hoñge barbādī

vagarna naqd-e-jān o sikka-e-dil ham bhī rakhte the

ḳhudā ke sāmne hogī jo pursish ishq-bāzoñ kī

kaheñge ham bhī itnā ishq-e-kāmil ham bhī rakhte the

tamannā thī hameñ bhī terī sohbat dekh lene kī

ki parvāne the shauq-o-zauq-e-mahfil ham bhī rakhte the

baḌe uqda-kushā the tum to hal is ko bhī karnā thā

muhimm-e-ishq sar karne kī mushkil ham bhī rakhte the

talāsh-e-yār meñ ḳhufiya ga.e ushshāq duniyā se

ḳhabar bhī kī na ham ko shauq-e-manzil ham bhī rakhte the

koī lahza judā.ī meñ taḌapne se na fursat thī

kabhī pahlū meñ dil mānind-e-bismil ham bhī rakhte the

junūñ kā zor thā dil meñ jagah kar lī thī vahshat ne

ġharaz pesh-e-nazar lailā o mahmil ham bhī rakhte the

jagah dil kī tarah pahlū meñ dī hotī hameñ tum ne

liyāqat is sar-afrāzī ke qābil ham bhī rakhte the

use kyūñkar na kahte ham ki yaktā hai ḳhudā.ī meñ

shanāsā the tamīz-e-haqq-o-bātil ham bhī rakhte the

ḳhudā ne jaan chhuḌvā.ī 'sharaf' vo ḳhud bigaḌ baiThā

haqīqat meñ ajab ma.ashūq-e-jāhil ham bhī rakhte the