Agha Hajju Sharaf

aalam mein hare honge ashjar jo main roya

Agha Hajju Sharaf

Lucknow, Uttar pradesh, India

1812-1887

aalam meñ hare hoñge ashjār jo maiñ royā

gulchīñ nahīñ sīñcheñge gulzār jo maiñ royā

barsegā jo abr aa kar khul jā.egā dam bhar meñ

aañsū nahīñ thamne ke ai yaar jo maiñ royā

ro.o.ge jharoke meñ tum hichkiyāñ le le kar

ai yaar kabhī zer-e-dīvār jo maiñ royā

zaḳhmī huuñ to hone do kyuuñ yaar bisorūñ maiñ

kyā baat rahī khā kar talvār jo maiñ royā

huuñ musta.id-e-riqqat farhād mujhe bahlā

le Dūbeñge tujh ko bhī kohsār jo maiñ royā

majnūñ ne kahā jaao vahshat unheñ dikhlāo

baiThā huā sahrā meñ be-kār jo maiñ royā

rahm aa gayā un ko kaTvā de mirī beḌī

zindān meñ chillā kar ik baar jo maiñ royā

ġhusse ke maare phir us ne na nigah sīdhī

in añkhḌiyoñ ho kar bīmār jo maiñ royā

betābī o zaarī par merī unheñ rahm aayā

dikhlā diyā mujh ko dīdār jo maiñ royā

ārām vo karte haiñ rulvā na mujhe ai dil

Thahreñge na vo ho kar bedār jo maiñ royā

aa.e the ba-mushkil vo laa.e the 'sharaf' un ko

phir uTh ga.e vo ho kar bedār jo maiñ royā

Top Urdushayar.com