mirā naam qais kyuuñ kar tire naam tak na pahuñche
ba-ḳhudā vo muqtadī kyā jo imaam tak na pahuñche
vo hayāt-e-ārzī kyā jo davām tak na pahuñche
vo usūl-e-zindagī kyā jo nizām tak na pahuñche
jo mujhe zalīl kah kar mujhe pūchhte ho sab se
mirī zaat tak to pahuñche mire naam tak na pahuñche
ye kisī kā mujh se kahnā kare ḳhalq jis se rusvā
koī aisī baat dekho mire naam tak na pahuñche
tire ishq meñ hamesha milīñ pechdār rāheñ
kabhī ham bhaTak bhaTak kar rah-e-ām tak na pahuñche