allāh re hausla mire qalb-e-do-nīm kā
jis ne sabaq paḌhā hai alif laam miim kā
uTThā na baar jalva-e-zāt-e-qadīm kā
itnā thā zarf dāva-e-chashm-e-kalīm kā
baḳhshish ḳhudā kī hai to shafā.at rasūl kī
rakhtā huuñ darmiyān karīm o rahīm kā
aasī ko apne dāman-e-rahmat meñ dī jagah
allāh re karam mire rabb-e-karīm kā
aasī sahī zalīl sahī pur-ḳhatā sahī
banda to hai 'rashīd' ġhafūrur-rahīm kā