muft dushnām-e-yār sunte haiñ
ek kah kar hazār sunte haiñ
tum himāyat karo na ġhairoñ kī
chaar kahte haiñ chaar sunte haiñ
ham fidā-e-chaman qafas meñ bhī
zikr-e-fasl-e-bahār sunte haiñ
kuchh to hai baat jo tire muñh se
suḳhan-e-nāgavār sunte haiñ
aap aur aa.eñ apne vaade par
aise fiqre hazār sunte haiñ
us se milne ko dil taḌaptā hai
ham jise be-qarār sunte haiñ
ham taġhazzul meñ aaj tujh ko 'rashīd'
hāsil-e-rozgār sunte haiñ