zamāne meñ mohabbat kī agar bārish nahīñ hotī
kisī insān ko insān kī ḳhvāhish nahīñ hotī
hazāroñ ranj-o-ġham kaise vo apne dil meñ rakhte haiñ
ki jin ke dil meñ thoḌī sī bhī gunjā.ish nahīñ hotī
ham apnī jaan de kar dostī kā haq nibhā dete
zamāne kī agar is meñ koī sāzish nahīñ hotī
tumhāre paañv to do-gām chal kar laḌkhaḌāte haiñ
hamāre azm-e-mohkam meñ kabhī laġhzish nahīñ hotī
tumhārī hī mohabbat kā sila hai ye ġhazal 'ārif'
laboñ ko sher kahne kī kabhī jumbish nahīñ hotī