tanhā apnī zaat liye phirtā huuñ maiñ

ḳhud ko apne saath liye phirtā huuñ maiñ

lafzoñ kā sailāb uñDelūñ ḳhaak yahāñ

nannhī sī ik baat liye phirtā huuñ maiñ

baḌī baḌī dīvāreñ kaise toḌūñgā!!

chhoTe chhoTe haath liye phirtā huuñ maiñ

harī bharī beloñ kā qissa kyā likkhūñ

sūkhe sūkhe paat liye phirtā huuñ maiñ

'sūraj' apne dil kī ujḌī bastī meñ

yādoñ kī bārāt liye phirtā huuñ maiñ