siina ḳhuuñ se bharā huā merā
uf ye bad-mast mai-kada merā
nā rasā.ī pe naaz hai jis ko
haa.e vo shauq-e-nā-rasā merā
dil-e-ġham-dīda par ḳhudā kī maar
siina aahoñ se chhil gayā merā
yaad ke tund-o-tez jhoñke se
aaj har daaġh jal uThā merā
yād-e-māzī azaab hai yārab
chhīn le mujh se hāfiza merā
minnat-e-charḳh se barī huuñ meñ
na huā jīte-jī bhalā merā
hai baḌā shaġhl zindagī 'aḳhtar'
pūchhte kyā ho mashġhala merā