pur-kaif ziyā.eñ hotī haiñ pur-nūr ujāle hote haiñ
jab ḳhāk-basar dil hotā hai aur arsh pe naale hote haiñ
hañste haiñ dahān-e-zaḳhm se ham gaate haiñ fuġhāñ ke barbat par
āshufta-saroñ kī duniyā ke sab Dhañg nirāle hote haiñ
kyā qahr barastā hai dil par sāvan kī shaboñ meñ kyā kahiye
kuchh dard kī phuvāreñ hotī haiñ kuchh yaas ke jhāle hote haiñ
in ujḌe hue armānoñ ko kis shauq se dil ne sīñchā thā
barbād magar hote haiñ vahī jo naam ke paale hote haiñ
chāhat ke sitam bardāsht kareñ mar mar ke ji.eñ aur mar na sakeñ
kyā jāniye kis miTTī ke bane ye chāhne vaale hote haiñ
dil tañg na ho ai rah-rav-e-ġham kāñToñ ke liye to kam se kam
mānind-e-naved-e-abr-e-karam ye paañv ke chhāle hote haiñ
uf-re vo nazākat lahje kī bāteñ jo nikaltī haiñ muñh se
yā chāñd kī kirneñ hotī haiñ yā barf ke gaale hote haiñ
ye dard-e-junūñ ye soz-e-jigar in kaifiyatoñ ke gird 'aḳhtar'
tasḳhīr ke halqe hoñ ki na hoñ taqdīs ke haale hote haiñ