koī ma.āl-e-mohabbat mujhe batāo nahīñ
maiñ ḳhvāb dekh rahā huuñ mujhe jagāo nahīñ
kisī kī yaad hai un kī mahak se vābasta
mujhe ye phuul ḳhudā ke liye suñghāo nahīñ
mohabbat aur javānī ke tazkire na karo
kisī satā.e hue ko bahut satāo nahīñ
ye kah rahā hai mohabbat kī kāvishoñ se dil
ye mere hañsne ke din haiñ mujhe rulāo nahīñ
ujaḌ ke phir nahīñ bastā jahān-e-dil 'aḳhtar'
bahār-e-bāġh ko is par dalīl laao nahīñ