hazār rañj ho dil laakh dard-mañd rahe

ḳhayāl past na ho hausla buland rahe

ġham-e-firāq meñ dil kyuuñ na dard-mañd rahe

bahār aa ke ga.ī ham qafas meñ band rahe

ḳhudā kī yaad meñ duniyā ko bhuul jā ai dil

vo kaam kar ki har ik tarf sūd-mand rahe

mile ki kuchh na mile māñgne se kaam rakhūñ

tirī janāb meñ dast-e-duā buland rahe

dikhā.īñ gardish-e-daurāñ ne sūrateñ kyā kyā

magar mujhe to akele tumhīñ pasand rahe

ġhurūr-e-husn unheñ inkisār-e-sheva-e-ishq

vo be-niyāz rahe ham niyāz-mand rahe

janāb-e-shaiḳh bhī 'maḳhmūr' shab ko rindoñ meñ

ajiib haal se masrūf-e-va.az-o-pand rahe