ḳhushk ā.ankhoñ se kahāñ tai ye masāfat hogī

dil ko samjhāyā thā ashkoñ kī zarūrat hogī

rañg mahloñ ke hasīñ ḳhvāb se bach kar rahnā

hai ḳhabar garm ki ḳhvāboñ kī tijārat hogī

apne ghar ḳhud hī pashemān sā lauT aayā huuñ

maiñ samajhtā thā use merī zarūrat hogī

merī tanhā.ī sukūñ dene lagī hai mujh ko

us se mat kahnā sunegā to nadāmat hogī

ḳhushk lab pyaas kī tasvīr ke andar rakh do

pyaas bujh jā.egī dariyā ko bhī hairat hogī

silsila jalte charāġhoñ kā chalo ḳhatm huā

tīrgī ḳhush hai havāoñ ko bhī rāhat hogī

kab sahar phūTegī koī tire zindānoñ se

kab rihā.ī mirī ai shahr-e-aziyyat hogī

jaise mumkin ho in ashkoñ ko bachāo 'tāriq'

shaam aa.ī to charāġhoñ kī zarūrat hogī