abhī tamām ā.inoñ meñ zarra zarra aab hai
ye kis ne tum se kah diyā ki zindagī ḳharāb hai
na jaane aaj ham pe pyaas kā ye kaisā qahr hai
ki jis taraf bhī dekhiye sarāb hī sarāb hai
har ek raah meñ miTe mai-e-nuqūsh-e-ārzū
har ik taraf thakī thakī sī rahguzār ḳhvāb hai
kabhī na dil ke sāgaroñ meñ tum utar sake magar
mire liye mirā vajūd ik khulī kitāb hai
har ek samt ret ret par havā ke naqsh haiñ
yahāñ to dasht dasht meñ havāoñ kā azaab hai