vo jab tak anjuman meñ jalva farmāne nahīñ aate
surāhī raqs meñ gardish meñ paimāne nahīñ aate
sharīk-e-dard ban kar apne begāne nahīñ aate
mai-e-ishrat jo piite haiñ vo ġham khāne nahīñ aate
lipaT kar sham.a kī lau se lagī dil kī bujhāte haiñ
parā.ī aag meñ jalne ko parvāne nahīñ aate
uḌāte hī phireñge umr bhar vo ḳhaak sahrā kī
tirī zulfoñ ke saa.e meñ jo dīvāne nahīñ aate
jo apnī aan par ai 'nāz' apnī jaan dete the
zamāne meñ nazar ab aise dīvāne nahīñ aate