dekhne meñ to lagte haiñ insān se
be-ḳhabar haiñ sab apnī hī pahchān se
hai tujhe yaad karne kī ḳhvāhish bahut
dil jo ġhāfil kabhī ho tire dhyān se
dushmanī kā koī dāv-kārī nahīñ
jiit lete haiñ dushman ko ehsān se
dil meñ shafqat ho chāhat ho iḳhlās ho
ghar kā matlab nahīñ sāz-o-sāmān se
yuuñ sar-e-rāh un se taqābul huā
jaise miltā hai anjān anjān se
ghar se bāhar to the mutma.in mutma.in
ghar meñ 'at.har' mile haiñ pareshān se