natīja tajassus kā behtar bhī hai
mashaqqat kī tah meñ muqaddar bhī hai
nadī paar karnā hī kaafī nahīñ
abhī rāste meñ samundar bhī hai
agar ghar ko chhoḌeñ to jaa.eñ kahāñ
qayāmat to khiḌkī se bāhar bhī hai
gulāboñ kā dhokā na khaa.e koī
azīzoñ kī jholī meñ patthar bhī hai
nahīñ niiñd āñkhoñ meñ tujh bin mirī
ḳhunuk raat hai tan pe chādar bhī hai
batāo zamāne meñ 'at.har' tumheñ
sukūñ ek din ko mayassar bhī hai