maiñ zamāne meñ huuñ lekin ye zamāna terā

haath merā hai luTātā hai ḳhazāna terā

tiir terā hai kamāñ terī nishāna terā

daam merā hai tah-e-dām hai daana terā

dā.ere sab ne aqā.ed ke banā rakkhe haiñ

varna maḳhsūs nahīñ koī Thikāna terā

jo bhī suntā hai vo unvān nayā detā hai

gasht kartā hai zamāne meñ fasāna terā

tez chaltī rahī tanqīd-o-siyāsat kī havā

gard-ālūd havā ā.ina-ḳhāna terā

ham-navā kis ko banā.ūñ kise hamrāz karūñ

maiñ akelā huuñ zamāne kā zamāna terā