ajab maujūdgī hai jo kamī par mushtamil hai
kisī kā shor merī ḳhāmushī par mushtamil hai
añdherī sub.h vīrāñ raat yā shām-e-fasurda
mirā har lamha un meñ se kisī par mushtamil hai
nahīñ mil paatī koī bhī hañsī merī hañsī meñ
ye vāhid rañj hai jo rañj hī par mushtamil hai
chamak uThtā hai ik bhūlā huā chehra achānak
na jaane tīrgī kis raushnī par mushtamil hai
sarāb-e-ḳhvāb dekhūñ yā uḌā.ūñ ḳhaak apnī
ye sahrā ik makāñ aur ik galī par mushtamil hai
varaq khulte hī kitnī titliyāñ uḌtī haiñ 'shāriq'
agarche baaġh ik sūkhī kalī par mushtamil hai