sadqe tere hote haiñ sūraj bhī sitāre bhī
ham kis se kaheñ dil hai siine meñ hamāre bhī
tā sub.h gire aañsū aur aañkh nahīñ jhapkī
is baat ke shāhid haiñ Duube hue taare bhī
dil kho ke milā ham ko jo kuchh vo bahut kuchh hai
is ishq kī baazī meñ ham jiite bhī haare bhī
jo kuchh thā mere dil meñ maiñ ne to kahā tum se
ab tum bhī kaho jo kuchh hai dil meñ tumhāre bhī
kyuuñ bahr-e-mohabbat meñ hai ḳhauf-e-ajal 'nātiq'
marne ko to marte haiñ dariyā ke kināre bhī