dil ko huā hai ishq mohabbat ke daaġh se
parvāna lau lagā.e hue haiñ charāġh se
dīdār-e-ruḳh nasīb huā dil ke daaġh se
sūraj ko maiñ ne DhūñDh liyā is charāġh se
ik dāġh-e-dil ne mujh ko diye be-shumār daaġh
paidā hue hazār charāġh is charāġh se
afsurda yuuñ huā dil-e-sozāñ ko uf na kī
aisā bujhā dhuāñ bhī na niklā charāġh se
'nātiq' diloñ meñ nuur hai is sham-e-husn kā
raushan hai sab ke ghar kā charāġh is charāġh se