har ek ruup hai us kā paheliyoñ kī tarah

khule na mujh pe vo ujḌī haveliyoñ kī tarah

ye rañg rañg parinde hī ham se achchhe haiñ

jo ik daraḳht pe rahte haiñ beliyoñ kī tarah

sunahrī dhuup meñ baiThī hoñ mil ke jab chiḌiyāñ

to chahchahātī haiñ alhaḌ saheliyoñ kī tarah

uThā ke haath duā.eñ na maañg bārish kī

falak bhī ḳhushk hai terī hatheliyoñ kī tarah

ujaḌ gayā hai magar raas rut badalne se

kabhī mahaktā thā 'ḳhāvar' chambeliyoñ kī tarah