kis lamhe ham terā dhyān nahīñ karte

haañ koī ahd-o-paimān nahīñ karte

har dam terī maalā japte haiñ lekin

galiyoñ kūchoñ meñ elaan nahīñ karte

apnī kahānī dil meñ chhupā kar rakhte haiñ

duniyā vāloñ ko hairān nahīñ karte

ik kamre ko band rakhā hai barsoñ se

vahāñ kisī ko ham mehmān nahīñ karte

ik jaisā dukh mil kar bāñTā karte haiñ

ik duuje par ham ehsān nahīñ karte

kuchh raste mushkil hī achchhe lagte haiñ

kuchh rastoñ ko ham āsān nahīñ karte

raste meñ jo miltā hai mil lete haiñ

achchhe bure kī ab pahchān nahīñ karte

jī kartā hai bhālū bandar naam rakheñ

kaun sī vahshat ham insān nahīñ karte

'ālam' us ke phuul to kab ke suukh ga.e

kyuuñ taaza apnā gul-dān nahīñ karte