ye kamra aur ye gard-o-ġhubār us kā hai

vo jis ne aanā nahīñ intizār us kā hai

rukī huuñ zaḳhm ke raqbe meñ apnī marzī se

ye jāntī huuñ ki qurb-o-javār us kā hai

kisī ḳhasāre ke saude meñ haath aayā thā

so ek qīmtī shai meñ shumār us kā hai

faqat firāq to itnā nasha nahīñ rakhtā

maiñ laḌkhaḌāī huuñ jis se ḳhumār us kā hai

ḳharīd saktī thī so maiñ ḳharīd laa.ī huuñ

vo mere paas hai chāhe hazār us kā hai

darīda-jāñ huuñ darīda-libāsiyāñ bhī haiñ

magar ye kam to nahīñ taar taar us kā hai

maiñ saiñt saiñt ke kitnā sameT kar rakhkhūñ

ki kā.enāt bharā intishār us kā hai

na jaane boltī rahtī huuñ niiñd meñ kyā kyā

jo naam suntī huuñ maiñ baar baar us kā hai

maiñ ghar se jā.ūñ to taalā lagā ke jaatī huuñ

kuchh us kī shohrateñ kuchh e'tibār us kā hai