kisī kashish ke kisī silsile kā honā thā
hameñ bhī āḳhirash ik dā.ere kā honā thā
abhī se achchhā huā raat so ga.ī varna
kabhī to ḳhatm-e-safar ratjage kā honā thā
barhana-tan baḌī guzrī thī zindagī apnī
libās ham ko hī ik dūsre kā honā thā
ham apnā dīda-e-bīnā pahan ke nikle the
saḌak ke biich kisī hādse kā honā thā
hamāre paañv se lipTī huī qayāmat thī
qadam qadam pe kisī zalzale kā honā thā
ham apne sāmne har lamha marte rahte the
hamāre dil meñ kisī maqbare kā honā thā
tamām raat bulātā rahā hai ik taara
ufuq ke paar kisī mo.ajaze kā honā thā
kisī ke sāmne uTThī nazar to bah niklā
hamārī aañkh meñ kyā aable kā honā thā
hisār-e-shahr se bāhar nikal hī aa.e haiñ
kabhī hameñ bhī kisī rāste kā honā thā