maiñ to sau baar tire milne ko aayā tanhā
lekin afsos kabhī tujh ko na paayā tanhā
shirk se ḳhālī kisī kā na nazar aayā dil
vo baḌe zarf haiñ jin meñ tū samāyā tanhā
kis ko da.avā nahīñ ulfat kā tirī aalam meñ
āshiqoñ meñ tire maiñ hī na kahāyā tanhā
band-e-kākul meñ tire jī bhī hamārā hai asiir
daam meñ zulf ke dil hī na phañsāyā tanhā
kal 'jahāñdār' ham aur yaar the Tuk mil baiThe
baḳht-e-nā-sāz ne phir aaj biThāyā tanhā