muntashir hote hue ambār ko tasvīr kar

soch kī photo banā afkār ko tasvīr kar

sabr ko kar canvas jo yaar kī ḳhātir sahā

yaar kī photo banā phir ġhaar ko tasvīr kar

camere meñ qaid kar tahrīr kī taklīf ko

hijr meñ likkhe ga.e ash.ār ko tasvīr kar

raat din phir un se kar to ham-kalāmī guftugū

iiñT kā ik dil banā dīvār ko tasvīr kar

ik qayāmat dekh le rohingya par TūTtī

dard ko ik shakl de āzār ko tasvīr kar

ḳhvāhishoñ ke ḳhūbsūrat qasr kī ta.amīr kar

kar mujassam ḳhvāb ko me.amār ko tasvīr kar