kisī kī yaad meñ be-kal rahī hai
vo ik laḌkī jo āñkheñ mal rahī hai
kisī kī raah ko itnā takā thā
hamārī aañkh barsoñ shal rahī hai
chhupā to lī hai apnī pyaas ham ne
magar jo chīḳh andar pal rahī hai
kisī ne paañv se zanjīr bāñdhī
kisī ke paañv meñ paa.el rahī hai
magar sach hai ki ik sūrat kisī kī
hamārī aañkh kā kājal rahī hai
koī āvāz mujh meñ gūñjtī thī
hamesha mujh meñ ik halchal rahī hai
basā rahtā hai mujh meñ shor kaisā
ye kaisī aag mujh meñ jal rahī hai
maiñ dhāḌeñ maar kar jo hañs rahī huuñ
mirī vahshat bhī us ko khal rahī hai
tumhārī yaad ik lohe kī kañghī
musalsal haDDiyoñ par chal rahī hai