shiddat-e-dard-e-jigar ho ye zarūrī to nahīñ
aur phir aañkh bhī tar ho ye zarūrī to nahīñ
be-ḳhudī bā.is-e-kulfat bhī to ho saktī hai
har nafas kaif-asar ho ye zarūrī to nahīñ
ḳhud ko pāmāl hī karnā hai to ai josh-e-junūñ
vo tirī rāh-guzar ho ye zarūrī to nahīñ
nashsha-e-ḳhvāb churā laa.e tirī āñkhoñ se
nāla-e-shab meñ asar ho ye zarūrī to nahīñ
nazar aatā hai jidhar silsila-e-naqsh-e-qadam
merī manzil bhī udhar ho ye zarūrī to nahiñ