mirī āñkhoñ ko āñkhoñ kā kināra kaun degā
samundar ko samundar meñ sahārā kaun degā
mire chehre ko chehra kab ināyat kar rahe ho
tumheñ mere sivā chehra tumhārā kaun degā
mire dariyā ne apne hī kināre kaaT Daale
bipharte pāniyoñ ko ab sahārā kaun degā
badan meñ ek sahrā jal rahā hai bujh rahā hai
mire dariyāoñ ko pahlā ishāra kaun degā
mohabbat niilā mausam ban ke aa jā.egī ik din
gulābī titliyoñ ko phir sahārā kaun degā