sitāre hī sirf rāstoñ meñ na kho rahe the
charāġh aur chāñd bhī gale mil ke ro rahe the
nigāh aise meñ ḳhaak pahchāntī kisī ko
ġhubār aisā thā ā.īne aks kho rahe the
kisī bayābāñ meñ dhuup rasta bhaTak ga.ī thī
kisī bhulāve meñ aa ke sab peḌ so rahe the
na rañj-e-hijrat thā aur na shauq-e-safar thā dil meñ
sab apne apne gunāh kā bojh Dho rahe the
'jamāl' us vaqt koī mujh se bichhaḌ rahā thā
zamīn aur āsmāñ jab ek ho rahe the