rāteñ mubārak sā.atoñ vaalī aur din barakat vaale
merī pūñjī kab lauTā.egā niilī chhat vaale
hadd-e-nigāh tilak phailā hai an-dekhā aaseb
gosha-e-dil meñ jhilmil jhilmil diip ibādat vaale
chāroñ jānib rachī huī hai ashkoñ kī bū-bās
is raste se guzre hoñge qāfile hijrat vaale
ek kalī mahkā.e hue thī puure baaġh kā baaġh
us kī galī ke saare log the achchhī aadat vaale
kabhī ye āñkheñ ḳhud bhī uḌā kartī thiiñ patañg ke saath
duur darīche se hote the ishāre hairat vaale
pichhlī raat ke qahr se pahle kī hai baat jamāl
apnī jholī meñ the chand sitāre qismat vaale