vo is jahān se hairān jaayā karte haiñ

jo apne aap ko pahchān jaayā karte haiñ

jo sirf ek Thikāne se tere vāqif haiñ

tirī galī meñ vo nādān jaayā karte haiñ

kisī ke hone na hone ke baare meñ aksar

akele-pan meñ baḌe dhyān jaayā karte haiñ

maiñ ab kabhī na dikhūñgā kisī ke marne se

ki shab guzār ke mehmān jaayā karte haiñ

jo asl baat hai us ko chhupāne kī ḳhātir

kabhī kabhī ġhalatī maan jaayā karte haiñ

ye baat aate hue sochtā nahīñ koī

ki sab yahāñ se pareshān jaayā karte haiñ

'jamāl' ham to tujhe ye bhī ab nahīñ kahte

kabhī kisī kā kahā maan jaayā karte haiñ