biich jañgal meñ pahuñch ke kitnī hairānī huī
ik sadā aa.ī achānak jānī-pahchānī huī
phir vahī chhat par akele ham vahī ThanDī havā
kitne andeshe baḌhe jab raat tūfānī huī
ho ga.ī duur an-ginat vīrāñ guzargāhoñ kī koft
ek bastī se guzarne meñ vo āsānī huī
us ne bārish meñ bhī khiḌkī khol ke dekhā nahīñ
bhīgne vāloñ ko kal kyā kyā pareshānī huī
gard-e-rah ke baiThte hī dekhtā kyā huuñ 'jamāl'
jānī-pahchānī huī har shakl an-jānī huī